Chini
Su nòmini de chini si pigat s’incuru de custu traballu est postu asuta de su tìtulu de custu giassu. Est su chi tenit sa càrriga de Cordinadori de su Boddeu Scientìficu de s’Acadèmia de su Sardu onlus, assòtziu chi persighit su bilinguismu italianu-sardu in Sardìnnia cun su traballu boluntàriu de is sòtzius in fainas de polìtica linguìstica e de stùdiu de ainas scientìficas arrelatadas a sa lìngua.
Poita
Poita ca sa majoria de is fueddàrius chi nci funt giai de diora portant a fitianu sceti una lista de fueddus allobaus “a unu a unu”. Lista de fueddus chi a bortas serbint sceti a fai su càrchidu de is fràsias italianas fueddu po fueddu (un’esempru de custa cosa fait a ddu biri meda in su de G. Casciu italianu-sardu). Finsas su de A. Rubattu e su sardu-italianu de G. Melis Onnis, chi puru funt arricus meda de fueddus, no faint àteru po su prus che a donai una lista de fueddus sardus chi “prus o mancu” currespundint a su fueddu italianu lematisau alfabeticamenti.
De cust’àndala si·ndi spicigat sceti su de M. Puddu, chi assumancu tenit sa bisura de “ditzionàriu” (mancai monolìngua), giai ca est prus arricu de esemprus de comenti is fueddus funt impreaus me is fràsias cumpridas. Sa farta de su Puddu est ca custus esemprus funt unu pagu ghetaus apari allistaus apustis e de sighida, sena ddus fai currespundi de manera crara a is sentidus diferentis de is fueddus chi intamis s’agatant me is disciniduras in conca a su lema; sena contai ca funt inditaus che a lema totu is bariedadis fonèticas de dònnia fueddu, cun o sena discinidura sena intzimia pretzisa, aici comenti dd’acucat.
S’idea chi movit custu giassu est chi siat pretzisu chi totu su chi fartat in custus fueddàrius innoi arremonaus si depat agatai amarolla in d·unu fueddàriu beni fatu po sa scola: ca po imparai a is pipius una lìngua chi est agiumai morendi·sì nci bolint esemprus cumprius fatus cun su sardu “beru”, chi no boleus chi su sardu de cras siat tambeni de prus unu dialetu de s’italianu.
Traballu faendi / Lavori in corso / Work in progress
Sa tenta de custu fueddàriu iat a essi de cresci abellu abellu cun s’aciunta de unus cantu fueddus dònnia dii (cosa chi at a fai su curadori). Po apoderai s’arregularidadi de sa strutura de su fueddàriu no at a fai a aciungi fueddus nous de parti de àterus. Mancu nau si bollat perou ca est benibeniu s’agiudu e su parri de totus is chi dd’ant a bolli donai, ponendi·nce·ddu in su logu po is cumentus de is fueddus chi ant a essi aciuntus dii po dii.
Fueddàriu sardu 